1. Heimildagreining: Fórnarlambafræði (gervigreind)
Verkefni: Greining heimildar
Markmið
Nemandi velur eina heimild úr námsefni kaflans og greinir hana sjálfstætt áður en hann notar gervigreind til að dýpka greininguna eða fá aðra sýn. Markmiðið er að læra að meta gæði heimilda og vinna með þær á gagnrýninn hátt – með stuðningi frá gervigreind, en án þess að treysta henni blint.
Þriggja skrefa nálgun
1. Sjálfstæð vinna (án gervigreindar)
Veldu eina heimild sem er vitnað til í kaflanum sem þú ert að vinna með. Þú átt að finna upplýsingarnar sjálfur og svara eftirfarandi spurningum með eigin orðum:
- Hvaða tegund heimildar er þetta (t.d. bók, tímaritsgrein, vefsvæði, bókakafli, skýrsla)?
- Hver er titill heimildarinnar?
- Hver er höfundur?
- Hvenær kom heimildin út (útgáfudagur)?
- Um hvað fjallar heimildin? Skrifaðu stutta samantekt (50–100 orð).
- Vísar höfundur heimildarinnar í aðrar heimildir? Ef já, hversu margar?
- Telur þú að þetta sé góð heimild? Rökstyddu svarið.
2. Aðstoð með gervigreind
Eftir að þú hefur unnið sjálfstætt skaltu nota gervigreind (t.d. ChatGPT) til að fá viðbótarupplýsingar eða aðra sýn. Þú gætir t.d. spurt:
- „Geturðu sagt mér meira um heimildina [titill] eftir [höfund]?“
- „Er [tiltekinn höfundur] virtur fræðimaður?“
- „Er þetta talin áreiðanleg heimild í félagsfræði?“
- „Hvaða gagnrýni hefur komið fram á þessa heimild eða nálgun?“
Markmiðið er að fá breiðari sýn, mögulega fræðilegari útskýringar – og jafnvel sjá hvort AI dregur fram eitthvað sem þú misstir af.
3. Samanburður og heildarniðurstaða
Skrifaðu lokaorð þar sem þú:
- Berð saman eigin greiningu og það sem gervigreind kom með.
- Útskýrir hvort þú ert sammála því sem AI segir – eða ef eitthvað var villandi, óskýrt eða óáreiðanlegt.
- Tekur afstöðu til þess hvort þér finnst gervigreind gagnleg við greiningu heimilda og útskýrir hvers vegna.
Lokaniðurstaðan á að vera skrifuð í þínum eigin orðum og byggja á gagnrýninni hugsun.